Perintehellini Karjalan ta vepšän šanelu -aktijo pietäh 20.–26. šulakuuta Karjalan tašavallašša šekä Leningradin, Tverin ta Vologdan alovehella. Tänä vuotena aktijoh ošallistuu yli 1200 ihmistä.
Aktijo starttuau Karjalan ta vepšän kirjakielen päivänä, 20. šulakuuta šanelun piäkaupunkissa. Petroskoin valtijonyliopiston tietokirjaštošša kaikki halukkahat šuahah kirjuttua šaneluo karjalan kielen vienan-, livvin- tai lyydinmurtehella šekä vepšän kielellä.
– Hyvä, jotta vuosi vuuvvelta yhä enemmän ihmisie tahtou ottua ošua šaneluh ta tarkistua, kuin hyvin hyö ošatah kirjuttua karjalakši tahi vepšäkši. Šanelu on šujuvan šuomelais-ugrilaisen yhteistyön kirkaš esimerkki, koroštau Karjalan tašavallan kanšallisen ta alovehellisen politiikan ministerijön kantakanšojen valtijollisen tuven ošašton johtaja Jelena Migunova.
Aktijon joka ošanottaja šuau tovissukšen. Ihmiset, kumpaset ei voija tulla kirjuttamah šaneluo järješšetyillä kentöillä, šuahah kirjuttua šitä videolähetykšien avulla, kumpasie julkaissah sosialiverkoissa.
Toimenpivon järještäjänä on Karjalan kanšallisen ta alovehellisen politiikan ministerijö Karjalan Rahvahan Liiton, Vepšäläisien kulttuurišeuran, Petroskoin valtijonyliopiston ta Karelija -tele- ta ratijoyhtyvehen avulla.
Šeurata aktijon uutisie šekä kaččuo kenttöjen luvetteluo šuau toimenpivon ryhmäššä VK-sosialiverkošša linkillä.