Mušt päliči voziš: Kalages avaitihe uz’ memorial
30. sügüz’kud, Karjalan päzutandan päiväl, Änižröunan Kalag’-küläs avaitihe muštpacaz min’oroiden muštoks. Se om omištadud norile neiččile da prihoile, kudambad Suren Kodiman voinan jäl’ghe puhtastiba sijaližid vepsläižid territorijoid ambundvaroišpäi. Muštpachan tegemižen tomotajan om “Šoutjärvelaine”-ecindjoukun ohjandai Viktor Lonin. Hän tariči Kalagen administracijale panda muštpachan, muga idei tuli eloho.
— Konz suomalaine armii läksi meiden agjaspäi, se jäti äi minoid. Ned oliba kaiktäli: pöudoil, rosanikoil, tropaižil, marjoiden penshiš, mecdorogoil, eskai pertidenno. Puttes minoile koliba kogonaižed kanzad, lapsed, naižed, živatad. Sen taguiči pättihe tehta joukuid, miččed puhtastaškandeba meiden mad minoišpäi. Šoutjärves oli tehtud koume joukud, miččehe mülüiba nored 15-17-voččed neiččed. Hö tegiba jügedan radon, äjad koliba tehtes tegendad, johtutab Viktor Lonin.
Muštpachal om kirjutadud min’oroiden nimed, päazjas ned oliba neiččed.
— Mö, kut ecindjoukun ühtnikad, pidäm hol’t min’oroiden kaumoiš, tuleskelem kaumoile, ližazi Viktor
Memorial om tehtud “Čornii kamen’” -radišton abul. Se tegemine om tarbhaine hašk Kalagen istorijan jäl’gendusen kaičendas.
Uzišt neciš temas voib lugeda mugažo karjalaks.
Tarkištele "Oma Median" MAX-kanalad!
