Moskvan metros kävub Karjalan Valdkundale omištadud pojezd
Čudokaz pojezd, miččen nimi om “Karjala om sija, kus väged pördase”, zavodihe kävuda Arbatan-Pokrovskan linijal 27. redukud. Se jatkub ihastoitta ristituid “Ščelkovskaja”- da “P’atnickoje šosse” -azotesiden kesken, siš tedotab Karjalan ekonomižen kehitoitusen ministerstvan press-služb.
Kaikutte vagon om kuti karjalaine londuz, kus valdoičeb üks’ vides londusenvägespäi: il’m, vezi, kivi, ma vai lämoi. Matkates metrol mehed voiba kävelta Karjalan tetabidme sijoidme. Vagonoiden seinäl eläbzuba “Ruskeala”-mägiparkan londuzkuvad, Ladogan da Änižen järviden randad, vezilanktusiden judu da arhitekturan muštpachiden — Valaam-saren da “Kiži”-muzei-kaičuztahon — vanhad seinäd.
Pojezdan irdnägo tundištoitab Moskvan eläjid da adivoid regionan melentartuisijoidenke, süvenzoitab Karjalan il’mištoho. Matkan aigan voib tedištada, mikš necidä regionad kuctas “planetan tävuks”, mikš karjalaine koiv om unikaline da mi om “kalit” — sijaližen keitändladun tradicionaline söm.
— Mugoine pojezd om hüvä voimuz lebaitas suren lidnan juduspäi da rižada tünüt, miččen Karjalan londuz lahjoičeb kaikuččele mehele, sanutas Ministerstvan press-službas.
“Karjala om sija, kus väged pördase” -pojezd om Moskvan da Karjalan regionoidenkeskeižen ühthižtön satuz. Nece projekt om tehtud Karjalan Pämehen Artur Parfenčikovan da Moskvan pämehen Sergei Sob’aninan tugel. Se abutab kehitoitta turistižid da kul’turižid kosketusid regionoiden kesken, a mugažo tundištoittab pälidnan eläjid Karjalan londusen da istorijan jäl’gestusenke i kingitada homaičust turistmatkoihe Venäman Pohjoižehe.
Uzišt neciš temas voib lugeda mugažo karjalaks.
Tarkištele "Oma Median" Telegram-kanalad!
