Moskovan näyttelyššä Karjalua esittäy digitalini Aino
Petroskoissa valmissetah digitalista Aino-avatarie. Šen nävökši on valittu Kiži-musejon ruataja, opaš, istorikko, karjalaisien laulujen esittäjä, kiäntäjä Marina Noženko. Marinan näköni Aino rupieu kertomah Karjalan tašavallašta Rahvahantalouven šuamisien näyttelyššä Moskovašša. Avatarin kuvaukšet on jo pietty.
— Petroskoin yliopiston mediakeškukšešša miulta otettih äijän erikokosie valokuvie eri šivuilta ta kuvattih video, kuin mie pakajan ta liikun. Mie olin Toive-ansamblin puvušša, še on nykyaikasešša tyylissä ommeltu karjalaini puku. Kohta rupiemma nauhottamah audiokappalehie, kumpaset Aino rupieu šanelomah vierahilla miun iänellä, šano Marina Noženko.
Näyttelyn järještäjät ollah varmoja, jotta šemmoni avatar jiäy vierahien muistih, kuin ni koko Karjalalla omissettu näyttely. Še avatah Moskovašša piemiekuušša.
Aihiešta voit lukie niise šuomekši ta vepšäkši.
