Monikanzalline Karjal -festivuali: eri rahvahien kul’tuuru nägövih
Petroskois Tehnolougien da biznesalan kolledžas perindön mugah piettih Monikanzalline Karjal -festivuali. Se oli yhtestostu moine pido, kuduan tavoittehennu on säilyttiä Karjalas eläjien kanzoin kul’tuuristu omaluaduvuttu da perindölöi, harjaittua nuorii da ruavahii elämäh sobuh da rauhas.
Täl kerdua pruazniekkah tuldih tazavallan opistoloin opastujat da opastajat, kanzallizien liittoloih kuulujat. Festivualis ozutettih karjalazien, vepsäläzien, ven’alazien, tatuaroin, uzbekoin, čečenoin, marilazien da toizien rahvahien perindölöi.
— Karjal on monikanzalline tazavaldu. Tiä eläy enämbi 140 kanzan edustajua. Se on meijän perindö, histourii, myö vuozisavoin aigah säilytämmö tädä kogemustu, monistammo niilöi da kaikis tärgevin on se, ku myö niilöi ozutammo. Täl laval rubieu kuulumah runoloi da pajoloi, meile ozutetah meijän muan eri kanzoin tansiloi. Se on meijän perindö, meijän kul’tuurine koodu da omažus, se, midä myö yhtes ylbeilemmö, sanoi Karjalan piämiehen lehtistöpalvelule Natalja Volkova, opastuksen da sportan varaministru.
Tehnolougien da biznesalan kolledžu tänä vuon pidi festivualin, kuduan tunnusanoinnu oli ”Monikanzalline Karjal — rahmannoi Karjal!”. Sendäh pivos sai nähtägi eri kanzoin syömizii, kuduat varustettih kolledžan opastujat da opastajat kulinuaruozaston piän al.
Aihies voit lugie suomeksegi.
Yhty Oman Median kanualah Telegramas!
