Monifunksionualline keskus andau hyvyöt kylisgi
Karjalan tazavallan monifunksionuallizes keskukses on kaheksatostu ozastuo, kuduat ruatah kui linnois, mugai kaikis piirikeskuksis. Keskuksen hyvyöt äijäl kebjendetäh kyläläzien elaigua, konzu valdivollizet da paikkukunnallizet palvelut – kaz’onnoit dielot ollah suadavat käzih. Ei maksa ajua Petroskoile libo toizih suurembih kohtih, spetsialistat iče kävväh kylih.
Paiči toimistokohtii linnois da piirikeskuksis monifunksionuallizes keskukses on ruadotilat, muga sanotut, loitokse hommatut. Niidy Karjalas on viizikymmen viizi. Se merkiččöy sidä, ku ruadajat ajellah ruadomašinoil palvelemah kylih da pos’olkoih. Kaikkiedah tazavaldah on suadu sada yheksäkymmen nelli ”ruadoikkunua”, kudamih kiändyjes suat oigevuolleh pasportan, spravkan libo mintahto tovestuksen.
Vuvves 2016 algajen monifunksionualline keskus ruadau Priäžän piiris. Kolme spetsialistua täs ollah ruadolois kiini. Piätavoiteh on andua ristittyzile mahto pyrgiekseh palveluloloih yhtes kohtas, ei lijjan loitton omas koispäi. Moizih kui Verosluužban, Rosrejestran, Sotsiuallizen kaičusfondan, Muaresursoin haldivon, Muahmuuttajien- da pasportusluužbat dai toizien hyvyöt.
Priäžän piirin monifunksionuallizen keskuksen johtai Miroslava Nazarjina mielihyväl sanelou kui palvelut on hommattu kylih:
— Meijän oma toimistotaloi on piirikeskukses Priäžäs. Ajelemmo palvelemah nelläh kohtah: D’essolah, Vieljärveh, Matrosoin da Čalnan kylih. Autammo ristittyzile täyttiä oigieh pakičuksen da otammo sen vastah hedi paikanpiäl. Autammo kerätä kai dokumentat yhteh tukkuh pakičuksen kel. Sit konzu vuotettavu dokumentu roiteh valmis, tuommo sen jo valmehekse. Ristikanzal pidäy vai tarkal, enne sovitul aijal tulla vastahotole. Sidä aigua vojii miärätä libo internetas, libo soittamal meile ennepäi. Tiettäväine, kyläläzet rahvas da semmite ijäkkähät puaksumbi soitetah.
Aijankohtaizet da enämbi toizii käytös olijat palvelut ollah rahvahan omažuon oigevuon kirjoilepanendu, muahmuuttajan eländykohtan registriiruičendu, pasportan hommuandu libo uvvekse muutandu. Monifunksionualline keskus ei vastua sit, suaugo ristikanzu hänele pädijän dokumentat valdivollizes elimespäi vai ei. Sildy sille ei ole valdua. Keskus on vai väliniekku ristikanzan da elimen välis.
