Miun šana tämpiänä: voittajat on valittu
Marafonih otti ošua 29 ihmistä Tveristä ta Tverin alovehelta, Karjalašta ta Šuomešta. Yhteheš oli 12700 kaččeluo! Ihmiset joka päivä painettih šanoja, mit oltih heilä mieltä myöten, klubin šivulla VK-verkošša. Šanat piti kirjuttua karjalan ta venäjän kielellä. Šamoin ihmiset voitih lisätä omih šanoih kulttuuritietoja, esimerkkijä, šanapolvijä šekä kuvan.
– 28 päivyä ošanottajat tavattih Lindu-klubin šivulla, kerrottih omista mielehisistä šanoista šekä šelitettih, mintäh valittih juuri šen šanan. Šamoin kaikin myö šaima tietyä äijän uutta karjalan kieleštä ta kulttuurista, kertou Lindu-klubin ohjuaja L’udmila Barhatova.
Marafonin voittajiksi tultih Larisa Ševčuk (Tver’), Ol’ga Ogneva (Petroskoi), Natalja Osipova (Tver’). Lahjakši naiset šuahah Aleksandra Punžinan valmistaman šanakirjan.
Šamoin aktiivisešti ruattih Klavdija Vinogradova (Rameški), Lena Ivanova (Tver’), Jelena Ligotskaja-Ivanova (Sohjanankoški). Lahjakši hyö šuahah kirjoja karjalan kielellä.
Lindu-klubin jäšenet kiitetäh kaikkie ošanottajie tverinkarjalan kielen kannattamisešta. Hyö toivotah kaikilla rikenempäh ottua käteh, lukie ta käyttyä elämäššä Aleksandra Punžinan tverinkarjalan šanakirjua.
