Mirun tegemine da Väinämöižen urohontegod – Eloho läksi “Runosarnoiden” koumanz’ pala
“Periodika”-painištos läksi Dmitrii Dmitrijevan “Runosarnad” -popul’arižen kirjserijan koumanz’ pala. Udes kirjas om kuz’ sarnad, miččed starinoičeba mirun tegemižes, ičepajatajas kanteles, Kuldaižes neiččes da živatoiš-abunikoiš.
— Karjalaižid runoid om äi, no päsüžetoid om vähän. Koumanz’ “Runosarnoiden” pala om erazvuiččiden runoiden kogomuz — nene runod om jo keratud pit’kembihe starinoihe. Ezmäižiden “Runosarnoiden” starinad minä kirjutin ani läheli materialad, mitte oli keratud Arhippa Pertuselpäi. Toižes kirjas mugažo naprin kaita runoiden süžetad ilma vajehtusita. “Runosarnoiden” koumanz’ pala om jo kogomuz. Tahtoin tundištoitta lugijoid nenidenke süžetoidenke, miše lapsed-ki tedištaižiba toižiš-ki karjalaižiš runoiš, starinoičeb “Oma Media” -portalale kirjan tegii da pirdai Dmitrii Dmitrijev.
Uziden “Runosarnoiden” pohjaze om ottud rahvahaližid runoid, miččed oli keratud XIX—XX voz’sadoil M. A. Perttuselpäi, A. F. Nikiforovalpäi, H. V. Tarjalpäi, T. Bogdanovalpäi, S. Küettiželpäi da toižilpäi runopajatajilpäi, kudambiden nimid keradajad ei kirjutanugoi.
Ezmäižen kerdan “Runosarnad”-kirj oli pästtud “Periodika”-painištos vodel 2021. “Runosarnad 2” läksi eloho vodel 2022.
Koumanden kirjan tiraž om 3000 ekzempl’arad. “Runosarnad 3” voib ostta “Periodika”-painištos.
Kirj om ani popul’arine lugijoiden keskes: ezmäine pala paindihe viž kerdad, a toine — koume kerdad.
