Ministerstvas pagištihe Karjalan rahvahiden problemoiš
19. semendkud Karjalan rahvahaližen da regionaižen politikan ministerstvas mäni Karjalaižiden, vepsläižiden da suomalaižiden ezitajiden nevondišton ištund, miččen aigan pagištihe kahtes temas: kodikeles da peniden eländtahoiden küliš.
Ezmäine tem koski karjalan kel’t da sen kävutandad kommercižes alovehes. Dokladanke sen polhe ezini Jekaterina Zaharova — filologijan tedokandidat da Kelen, literaturan i istorijan institutan Kel’tedon sektoran pämez’. Hän starinoiči siš, kut karjalan kel’t kävutadas turizmas da biznesas i kut nece kaik tarkišteldas (vai jäb tarkištelmata). Nügüd’ — Karjalan kul’turan popul’arižuden kazvon tagut — baltianmeren suomalaižid nimid kävutadas ani paksus, i Karjalan eläjad lugeba sidä lujas tärktaks regionan kehitoitandan täht.
— Neche problemaha tariž kingitada sur’ homaičuz, sikš ku kel’ om tärged Karjalan mel’kuvan pala. Meil om “Moi biznes” -keskuz, mitte andab äipolišt tuged biznesmehile. Keskuses radab openduzerišt, i minä taričen kucta keskusehe kodikelen specialistoid konsul’tiruimaha biznesmehid keliden küzundoiš. Nece voib abutada tehta objektoiden i projektoiden nimid oiktembikš da čomembikš, sanui Karjalan ekonomižen kehitoitandan ezmäine varaministr Aleksandr Lomako.
Toine ištundan pala oli omištadud Karjalan peniden eländtahoiden kehitoitandale. Siš ičeze dokladas starinoiči Aleksandr Lomako. Hän tedištoiti ištundan ühtnikoile socialiž-ekonomižen kehitoitandan programmas, mitte todenzoittas Karjalan peniš eländtahoiš. Neche programmaha mülüb 80 eländtahod, miččiden keskes om 24 tradicionališt vepsläižiden da karjalaižiden küläd. Planoiš om kehitoitta kul’turan, opendusen da tervhuden alovehid, eländpertiden sauvondad, a mugažo paremboita teid.
Uzišt neciš temas voib lugeda mugažo karjalaks.
Tarkištele "Oma Median" MAX-kanalad!
