Mihail Mišustin andoi Ven’an haldivon palkindon kul’tuurualan ruadolois
Ven’an haldivon piämies Mihail Mišustin andoi palkindot vuvvennu 2024 todevutettulois kul’tuurualan projektois. Omas ezitykses Mišustin korosti, ku palkittavat projektaе annettih rahvahale mahton yhtyö Ven’an rikkahan perindön säilyttämizeh.
— Artistoin da uvven ludijoin vastus oli ylen suuri. Sendäh ku kul’tuuru ainos enzimäzenny andau vastavuksen tärgevimih kyzymyksih, sanoi Mihail Mišustin Ven’an haldivon Telegram-kanualale.
Vuvvennu 2024 haldivon palkindot suadih seiččie projektua, jogahine niilöis on tärgei da erinomaine ilmivö omal alal.
Palkittuloin joukos ollah Rajev-linnan Serafim Sarovskoin kirikön ižändy Aleksei Jakovlev, Perindö-yhteiskunnallizen liiton piälikkö Andrei Bode da Ižänmuan hengellis-kul’tuurizen perindön elavuttamizen fondan piälikkö Lidija Kuritsina da heijän projektu “Yhtehine ruado. Pohjaispuolen puuhizien kirikkölöin elavuttamine”.
Projektu “Yhtehine ruado. Pohjaispuolen puuhizien kirikkölöin elavuttamine” sai allun vuvvennu 2006, on luajittu meijän muan pohjaipuolen puuhizien kirikkölöin da časounoin säilyttämizekse da toimiu Pyhän Moskovan da kogo Ven’an patriarhan blahosloven’n’as. Kaheksastostu vuvves on luajittu 560 ruadomatkua Ven’an pohjaispuolen eri kolkih — Arhangel’skan, Voulogdan, Piiterin alovehile, sego Komin da Karjalan tazavaldah, tutkittu 360 kirikkyö da časounua da säilytetty 187.
— Karjalan tazavaldu ihan projektan allus yhtyi sen ruadoh. Kižin muzeigi oli sit joukos. Meijän muzein spetsialistat, restavruatorat da ekspertat nevvottih projektan volont’ouroi, ku kai ruavot odas luajittu tolkun luaduh da Ven’an zakonan mugah. Projektu luadi suuren panoksen tärgieh ruadoh kul’tuuruperindön säilyttämizekse. Karjalas on äijy kyliä da hieruu, kudamis on pahas kunnos olijua kirikkyö da časounua. Net pidäy kiirehel “konserviiruija”, ku niilöih konzutahto tuldas uskovazet. Projektu ruadau vie sengi hyvän ruavon, ku kirikkölöin da časounoin kohendettuu rakendajat, volont’ourat lähtietäh iäres, kiriköt jiäjäh kyläläzien huoleh, heis viriey uskon kyven da vastus omas muas, sanou Tatjana Nezvitskaja, Kižin muzein V.S.Rahmanovan nimellizen kogo Ven’an puuhizen arhitektuuran keskuksen tiedo-metoudizen ozaston piälikkö Oma Media -portualale.
Aihies voit lugie ven'aksegi.
