Mennyh da tulii aigu vastavutah
Rahvahallizen taijon da taidoalguhpanoloin keskus pani rattahile uvven projektan. Vuvvennu 2026 hyö pietäh Petroskois Perindö-etnoluageri.
— Etnoluagerin idei juohtui mieleh juuri ičes rahvahan taijos, sen sinkretizmas. Rahvahallizes kul’tuurashäi sana, muuzikku da tansi ollah yhtes. Pajo eli tansis, tansi eli perindös, a jogahine ristikanzu oli kerras soittai da pajattai da kaččoi samal tiel. Sen elävän energien myö tahtommogi eistiä ielleh. Ga ruammo vie rohkiembah — yhtistämmö perindöt da nygözen aijan, sanoi Oma Mediale Tatajana Ledneva, Rahvahallizen taijon da taidoalguhpanoloin keskuksen varapiämies.
Etnoluagerin aihiennu rodieu rahvahallizen pajo- da tansineron luaduloin da nygyaigazen audiovizualizen taijon sintezu. Rahvahallizet meloudiet da elektrouniekku, ennevahnaine tansi da nygyaigaine horeogruafii, ”elävy” vokalu da saund-dizain yhtytäh.
Kuvven päivän aigah Ven’alpäi tulluot opastajien da nevvojien avul ruvetah ruadamah ruadopajois da taidolaboratourielois. Zajavkoi otetah vastah heinykuus algajen.
Rahvahallizen taijon da kul’tuurualguhpanoloin keskuksen ruadajat endizis projektois opastettih soittamah kandelehel da jouhikol, pajattamah ennevahnazii pajoloi. Mennyt vuon, sygyzyl hyö piettih Kruuga KEMP-performans, kuduas rahvahalline tansi yhtyi nygyaigazeh horeogruafieh ”elävän” muuzikan myödäh.
Uuttu Perindö-etnoluageri-projektua keskus todevuttau Ven’an kul’tuuran fondan kannatuksel da kanzallizen Pereh-projektan mugah.
Yhty Oman Median kanualah MAX:as!
