Meliorativnoin lapset kilbaltihes kielineros
Sulakuun 7. päivänny Meliorativnoin kylän päivykois piettih jo perindölline Karjalazet lapset -kilbu. Päivykoin vahnembat lapset ozutettih omile vahnembile da Onieganrannikon piirin päivykodiloin ruadajile, kui hyö maltetah karjalan kieldy, ozutettih, mittumat hyö ollah artistat, taidoilijat, omah iččeh nähte sanelijat.
Meliorativnoin škola-päivykois lapset opastutah karjalan kielen livvin piämurdeheh da karjalazien kul’tuurah kolmen vuvven ijäs algajen. Täs joga lapsienjoukon ven’ankielizen nimen rinnal on kirjutettu joukon nimi karjalaksegi: “Ojaine”, “N’amu” da toizet.
Karjalan kieleh harjaittau lapsii Natalja Jefimova. Alavozen karjalaine naine opastau karjalua Meliorativnoin lapsile vuvves 1999.
Moizii kilboi päivykois pietäh joga vuottu, arvostetamah lapsii kučutah rahvastu muijalpäi. Tänä vuon arvostajien joukos oli Šuojun päivykoin ruadai karjalaine Tatjana Dubrovskaja, “Oman Muan” toimittai Ol’ga Smotrova, Vad-laitoksen ruadajat karjalaine mies Aleksandr Kuznetsov da Tatjana Aleksejeva.
Kilbah yhtyi kaksitostu lastu — kuuzi brihaččuu, kuuzi tyttösty. Kaikis mieldykiinnittävin kilvan etuappu oli karjalankielizien častuškoin pajattamine da runoloin lugemine, tytöt pajatettih, brihačut lugiettih. Častuškat da runot lapset vallittih lyhyöt, ga vesselät — L’ubov’ Tuttujevan da Vladimir Brendojevan tevokset. Opastuo lugemah karjalakse tarkah da oigieh nygyaijal on vaigiettavu, paiči päivykodiihäi kieldy hyö nikus ei kuulta.
Voittajua kahtestostu lapses rodih kaksi: Jekaterina Osipova da Jaroslav Mavričev.
Hyvät lahjat kilbuniekoile da pidoh yhtynyzile lapsile hommai Vad-laitos, kudaman kantor on Meliorativnois. Omat mustolahjat varustettih lapsile Kipinä-žurnualan toimittajatgi.
Yhty Oman Median kanualah MAX:as!
