Meliorativnoi-pos’olka šai uuvven ambulatorijan
Oneganrannan piirissä alko toimie uuši nykyaikani liäketiijollini objekti — Meliorativnoin ambulatorija. Nyt pos’olkan 2200 eläjyä voipi šuaha apuo uušissa mukavissa oloissa. Ambulatorijah on ašetettu nykyaikasie laittehie, a olot autetah potilahien tehokašta vaštahottua, kertou Karjalan tašavallan tervehyšhoitoministerijö.
— Pari päivyä takaperin Järvenoja šai uuvven ambulatorijan, a nyt Meliotativnoin nykyaikani liäketiijollini laitoš ottau vaštah potilahie. Pos’olkan eläjät innolla vuotettih ambulatorijan avuamista. Nyt lapšilla ta aikuhisilla on mahollisuš šuaha liäkärin apuo valosašta, lämpimäštä ta mukavašta rakennukšešta. Passipo Karjalan tervehyšhoitoministerijöllä yhteistyöštä tämän kyšymykšen ratkaisomisešša, lainuau ministerijö Karjalan lakienluajintakokoukšen varapakinamiehen Ol’ga Šmajenikin šanoja.
Ambulatorija on rakennettu Pitkä ta aktiivini elämä -kanšallisprojektin rajoissa. Laitokšešša ruatah terapefti, pediatri, šairahienhoitaja ta toiset tarvittavat spesialistit. Šamoin annetah enšiapuo. Kohta avautuu hammašliäketiijollini huoneh.
Uuši objekti on tärkie aškel kohti šuatavilla olijan ta luavullisen liäkärialan kehittämistä tašavallan piirilöissä.
Felššeripunktien ta ambulatorijojen rakentamini kylissä muašeuvulla kuuluu Yhtenäisen Venäjän kanšanohjelmah. Šen rajoissa viime vuosina Karjalah avattih melkein 40 liäketiijollista laitošta.
Yhty Oman Median MAX-kanalah!
