Talvikuun alušša Saranskissa ilmotettih šuomelais-ugrilaisilla ta samojedikielillä luotujen runojen ta kertomukšien kilpailun tulokšet šekä piettih Meijän šukupolvi -kokomukšen esittely kilpailun parahien tevokšien kera. Toimenpitoh ošallissuttih Venäjän kirjailijaliiton jäšenet, tunnetut kirjailijat ta dramakirjailijat, kilpailun ošanottajat Venäjän eri alovehilta.
— Meijän šukupolvi -kilpailu piettih 12. šyyškuuta šuaten. Kilpailuh oli työnnetty 153 anomušta luovine tevokšineh 15 šuomelais-ugrilaisella ta samojedikielellä Venäjän 21 alovehelta. Meijän šukupolvi -kokomukšeh kuulutah kilpailun parahat tevokšet muamonkielillä šekä niijen venäjännökšet, šelitti toimenpivošša Mokša-kuvalehen piätoimittaja Marina Anikina.
Kilpailun tulokšie ilmotettih kolmen nominatijon mukah: “Muamonkieli miun elämäššä”, “Miun kanša” ta “Muan kanšat ollah yhtehini pereh”. Yhteheš oli palkittu 12 voittajua. Miun kanša -nominatijošša toisella šijalla piäsi vienankarjalaini runoilija Sergei Jakovlev Louhen piirin Nisašta. Hänen anomuš oli ainut luomistyö työnnetty kilpailuh karjalan kielellä.
— Ošallistumini šemmoseh šuureh kilpailuh oli hyvin vaštuullini miula. Oli vaikieta valita runot, kumpaset esitettäis meijän elämyä ta tuntehie. Šentäh mie työnnin kilpailuh omie runoja nellän alan mukah: rakkahuš, huumori, lapšet ta luonto. Olen ylpie, jotta esitän karjalaisie niin mahtavalla kentällä, kerto vaikutelmieh kilpailun tulokšista Sergei Jakovlev.
Kilpailun kaikki voittajat šuahah hyvie lahjoja ta sertifikattija šekä Meijän šukupolvi -kirjan kappalehie, kumpasie työnnetäh ni Venäjän eri alovehien kirjaštoih.
Tietyšti, muamonkielellä luojat kirjuttajat tarvitah valtijon apuo muun muašša ni omien tevokšien julkaisomisešša. Ideja julkaissa kokomuš kilpailun tulokšien mukah oli ehotettu Venäjän Federatijon šuomelais-ugrilaisien kanšojen intellektualisen luomistyön festivalissa, mi piettih Saranskissa pimiekuun alušša. Nyt Meijän šukupolvi -kokomukšen avulla kirjailijien luomistyöh šuahah tuttavuštuo Venäjän eri alovehilla.
Meijän šukupolvi -kilpailun viettämini ta kirjan julkaisomini tuli mahollisekši Kanšallisukšien aseita hoitajan federalisen toimiston kannatukšella.