Meijän šankarien muissokši
Männyön netälin šuovattana Kalevalašša piettih merkittävä tapahtuma – Kis-Kis -puoluššušlinjan paikan uuvvissetun muistomerkin avajaiset.
Puoluššušlinjan muistomerkki oli uuvvissettu Pieni ihmini šuurella šovalla -projektin toteuttamisen puittehissa. Še šai äijän muutokšie: puoluššušrakentehet oli šuatu entiseh kuntoh, ašetettu uušie tiijotuštauluja, tykiaše ta šotilahan pačaš oli mualattu.
— Projektin anšijošta Kalevalan piirissä luajittih lujat šukupolvien yhtyvehet, kumpasien pohjana on muisto Šuuren Isänmuallisen šovan istorijan yheštä dramattisimmista šivuloista ta ylpevyš pravoukkojen, ukkojen ta tuattojen urošruavoista, šanottih projektin toteuttajat.
“Šovan lapšien” šukupolvelta šuatih pereharhiivoissa ta muisselmissa šäilyttyjä tietoja niistä istorijallisista tapahtumista šekä valokuvie ta esitettih niitä näyttelyššä Kalevalatalo-etnokeškukšešša. Še oli avattu niise šuovattana ta šiih jo voijah tuttavuštuo Kalevalan eläjät ta vierahat.
Kaikki halukkahat tuttavuššuttih šotilahien arkielämän esinehien näyttelyh, kumpasen valmisti Pol’ot -musejo-näyttely kompleksi, šyötih šotilahan huttuo ta juotih kuumua čäijyö.
Kis-Kis -kukkuloilla vuotena 1941 oli puoluššušlinja ta še šeisatti vihollisen mänön itäh. Näillä kukkuloilla neuvoštošotilahat nellän vuuvven aikana ei annettu vihollisen piäššä Kirovin rautatiellä.
Muistomerkki on ollun Karjalan rintaman Uhtuon šuunnan taistelujen ošallistujien ta veteranien vakituini vaštautumispaikka.
