“Kel’ – minun Kodima”-projekt todenzoittas eloho necil vodel. Se om oigetud vepsän kelen da kul’turan kaičendaha da popul’arizoitandaha. Projektan azjtegod mäneba Änižröunan vepsläižiš školiš, lapsiden päivkodiš, a mugažo Suomalaiž-ugrilaižes školas da universitetas.
— Tahtoiše, miše lapsed tedaižiba ičeze rahvahan istorijan da kul’turan polhe, kävutaižiba kodikel’t jogapäiväižes elos, pagižižiba vepsän kelel kanzas, ičeze sebranikoidenke, sanub Vepsän kul’tursebran pämez’ Larisa Čirkova.
Tetab vepsläine fotograf Ilja Timin opendaškab lapsid tehmaha fotokuvid. Satusen linneb foto-ozuteluz ”Kalarand”-etnoparkas. Vepsläižiden küliden vanhad eläjad ozutaškaba mastar’-klassoil, kut pidab panda varha nin’t, keittä len’t, tehta kevel touknad, kudoda, lämbitada mustad kül’betid. Satusen linneba videorolikad.
— Om tärged rata lapsidenke, sündutada heiš armastust ičeze rahvahan kel’he, kul’turaha, tradicijoihe da veroihe, ližazi Larisa Čirkova.
Kalages, Šoutjärves da Šokšus aigvoččiden täht jatketas vedäda vepsän kelen kursid, radaškandeba taidehstudii da käzitön studii lapsiden täht. Mugažo projektan aigan änetadas kaks’ audiokirjad vepsän kelel da paindas Ol’ga Žukovan kirj lapsiden täht.