Marjojen poimintakauši on miärätty
Tašavallan Belomorskin, Kalevalan, Kemin, Louhen, Mujejärven, Segežan piirilöissä šekä Koštamukšen kaupunkipiirissä on annettu lupa kerätä mussikkua elokuun 5. päiväštä alkuan, puolua – elokuun 25. päiväštä alkuan, a karpaluo – šyyškuun 20. päiväštä alkuan.
Karjalan šuvipiirilöissä mussikan poimintakauši alkau 25. heinäkuuta, puolan – 20. elokuuta, a karpalon – 15. šyyškuuta.
– Šiih aikah marjat keritäh kypšyö. Ennein miärättyö kautta kerätä mussikkua, puolua ta karpaluo ei šua, šentäh kun še vaikuttau marjan pahah šatoh enši vuotena, kerrotah Luonnonvarojen ministerijön spesialistit omašša VK-ryhmäššä.
Ministerijön spesialistit muissutetah, jotta lakien mukah ilman tarvittavie dokumenttija voipi kerätä marjua vain omien tarpehien mukah. Poimintakauven rikkomisešta miärätäh šakko.
Pitäy muistua, jotta kuni Karjalašša on ilmotettu hätätilajärješšyš tulipalojen takie, ni ihmisie kyšytäh kieltäytyö meččäh käynnistä! A Šuojärven, Priäžän, Mujejärven ta Sezežan piirilöissä käynti meččäh on virallisešti kielletty.
Tultuo meččäh on pakko piteliytyö tulipaloturvallisuon šiäntöjä. Mečäššä ei šua virittyä ropivoja ta šytyttyä tulta, ei šua tupakoija ta työntyä palajie tulitikkuja!
