Marilazien rahmannožuon perindöt: tulgua käymäh
Kanzallizes kirjastos 4. kevätkuudu 17.00 čuasun aigah ”Karjalan marilazet” pietäh oman liiton 15-vuozipäiväle omistettuu marilazien kul’tuuran illaččuu ”Tulgua meile gostih” (12+). Pivos sanellah marilazien da karjalazien gostien vastahotandas da rahmannožuon perindölöis.
Marin naizien Saskavii -liiton inehmizet ruvetah sanelemah, kui marilazet otetah vastah gostii. Hyö suajah yhtevytty Petroskois pidoh kerävynnyzih ”telesillan” vuoh Marin kanzallizes kirjastospäi. Karjalazien perindölöih nähte sanelou Karjalan Tiedokeskuksen ruadai Sergei Minvalejev.
— Rubien sanelemah karjalazien ad’voih käyndäs, konzu nuoret neidizet ajeltih omahizilluo toizih kylih, sie autettih kuda-midä kodiruadolois da yhtel tiel heil oli mahto tuttavuo sigäläzih nuorih brihoih. Sanelen vie perindös, konzu molodoit jälles svuad’bua käydih apin da anopin luokse, a sen jälles appi da anoppi käydih ”päččii murendamah” da kaččomah, kui nuoret eletäh, sanoi Oma Mediale Sergei Minvalejev.
Illačun luadijoinnu ollah Karjalan tazavallan Kanzallizen da alovehellizen poliitiekan ministerstvu, Petroskoin linnan haldivo, ”Karjalan marilazet”, Karjalan da Marii El -tazavallan kanzallizet kirjastot.
