Karjalaisien ta vepšäläisien kešen rikeneh kuuluu riitoja, mimmoni kalitta on makein? Periodika-kuštantamošša piätettih ratkaissa tätä riitelyö.
Kalitta-kilpailuh otti ošua šeiččemen leipurie, kumpaset tuotih potakka-, prossa- ta osrakalittoja. Yhet sriäppijät paissetah šemmosie kalittoja, mimmosie luajittih heijän ämmöt, a toiset vašta ruvettih opaštumah paistamah niitä.
– Mie muissan, jotta meilä luajittih šemmosie pyöreitä kalittoja ta täyttehenä pantih osrua. Taikinua luajittih ruisjauhošta ta lisättih vähän vehnäjauhuo, kerto omista kalitoista vepšäläini ošanottaja Galina Lokkina.
Enšin joka halukaš šai maissella kalittoja ta iäneštyä makeimmista. Šiitä kalittoja tarittih arvoštelijilla, kumpaset arvoššettih piiraijen makuo, muotuo ta kuoren pakšutta.
– Še on epätavallini kilpailu. Jokahisella kalitalla on oma maku ta šiitä ei pie riijellä. Kyllä ne kalitat, kumpasie paissettih vanhojen reseptien mukah, ei olla niin rašvasie ta mavukkahie, kuin nykyset, ka myö arvoššamma šitä, jotta perinneh šäilyy, šelitti arvoštelijakunnan jäšen Jelena Migunova.
Arvoštelijien mieli šekä kanšaniäneštämisen tuloš oli šamanmoini: makeimmakši oli tunnuššettu Natalja Sinitskajan kalitta. Toisista kalitoista oli annettu erilaisie arvošanoja. Kilpailun kaikki ošanottajat šuatih lahjoja.
Kalitta-kilpailu piettih Šuomelais-ugrilaisien heimopäivien rajoissa.