Lyydiläisien päivänä Petroskoissa Lyydiläisien etnokulttuurikeškukšešša piettih juhlallini toimenpito. Šiih tuli Karjalan lyydiläiset -kanšalaisjärještön etuštajie, lyydin murtehen kurššien opaštajie ta opaštujie, Kielen, kirjallisuon ta istorijan instituutin tietomiehie, lyydien kieleštä ta kulttuurista kinnoštunuita ihmisie.
– Juhlallisena iltana myö kuuntelima onnitteluja ta esitelmie Šuomen, Viron ta Pyhäjärven lyydiläisiltä. Tietomieš, runoilija ta kirjailija Miikul Pahomov kerto lyydin kielen tutkimisešta ta kehittämiseštä. Šiitä myö yheššä lauloma lauluja lyydiksi, keškuštelima šuunnitelmista ta joima čäijyö perintehellisien karjalaisien piirakkojen kera, šano Lyydiläisien etnokulttuurikeškukšen johtaja Lidija Konovalova.
Lyydiläisien šeurojen šuunnitelmissa on jatkua kielikurššija ta murtehen tutkimistyötä. Tämän vuuvven kešänä Kielen, kirjallisuon ta istorijan instituutin lyydin murtehen tutkijat Aleksandra Rodionova ta Sergei Minvalejev šuunnitellah lähtie lyydiläisih kylih pakauttelomah lyydiläisie ta keryämäh tietoja.
Šamoin lyydiläiset tahotah julkaissa šanakirja kielikurššija varoin.