Lyhyöt luvendot: vuotammo kuundelijoi
Talven da keviän aigua Karjalan Rahvahan Liiton johtokundu mielihyväl kuččuu pienih luvendoloih školaniekkoi, yliopiston opastujii, karjalan kielen kursoin kuundelijoi da kaikkii, ket suvaijah da tahtotah tiijustua enämbän meijan kielen da kul’tuuran kehittämizes da muuttumizes.
Kerran kuus kuundelijoile paginua pietäh kielen tutkijat, kieliaktivistat, Oma Mua -lehten toimittajat, muzikantat da muasterit. Luvendoloin teemoikse on otettu ylen tärgiet kohtat, net koskietah karjalan kielen, kul’tuuran da turizmualan erilazii puolii. Enne Voitonpäiviä vie kerran mustelemmo yhtes meijän urholoi da voinan jygielöi päivii.
― Enzimästy luvendoildua rubiemmo pidämäh tuhukuun 19. päivänny da se rodieu omistettu Kanzoinvälizen muamankielen päiväkse. Sendäh luvendoloin pidäjikse on kuččuttu semmozii rahvahii, ken ammui jo ruatah kielialal da kel on midä sanuo toizile da vastata erilazih kyzymyksih, sanou Karjalan Rahvahan Liiton johtokundah kuului Valentina Mironova.
— Enzimäzen luvendon aigua tiijustammo, mittuman LiPpahan valmistetah Kielen, literatuuran da histourien kielentutkijat da midä hyödyy on sähközes sanakniigas meile kaikile. Paginua sih näh pietäh tundiettu kielentutkii da sanakniigoin luadii Tatjana Petrovna Boiko da Kielen, literatuuran da histourien instituutan johtai Irina Novak.
Piduo jatketah tutkijat Svetlana Nagurnaja da Jekaterina Zaharova. Hyö sanellah, kui karjalan kieldy käytetäh Karjalan erilazet laitokset. Puaksuh linnas kävelles sie da tiä voibi nähtä sellazii nimilaudoi, kuduan merkičysty kerras ei sua ellendiä. Sanoi semmozih nimilaudazih on otettu karjalan kieles, ga toiči niidy on käytetty viäräh. Luvendon aigua ezimerkilöin avul rahvas tiijustetah, midä mostu kummakastu on Petroskoil.
Jälgimäzenny paginua pidäy kieliaktivistu da “Oman Muan” toimittai Natalja Antonova. Häi ozuttau, mittuine čoma on karjalan kieli. Karjalazil ammuzis aijois oli käytös erilazii frazeologizmoi, harvah ken oigieh on sanonuh, gu ristikanzu on lašku libo tuhmu. Maltettih löydiä pättävii virkehii dai ristikanzal ei olluh ylen abei kuulta mostu arvostustu ičes.
Terveh tulgua 19. päivänny tuhukuudu 16. 30 aigah Karjalazien, vepsäläzien da suomelazien kielikeskukseh adresil G.Titovan uuličču, 3. 6+
