Lugekam “Kalevalan” runoid ühtes!
Petroskoin universitetan baltianmeren suomalaižen filologijan kafedr kucub kaikid tahtnikoid ühtnemaha “Lugem “Kalevalan” runoid” -online-konkursaha. Sen pätegend om kaita da popul’arizoitta Karjalan da Suomen kelišt i literaturišt kul’turjäl’gestust.
Ühtneda konkursaha voiba 12-voččed da vanhembad ristitud. Kaik radod arvosteldas koumes igäkategorijas: 12—15 vot, 16—23 vot da 24 i enamba vot.
Ühtnikoile tariž tehta videorolik, miččes lugeda än’heze oteg (35—50 rivid) “Kalevala”-eposaspäi. Lugeda voib karjalan kelen paginoil, a mugažo vepsän da suomen kelil — jogahižen kelen täht om tehtud eriline nominacii.
— Meletan, miše nece konkurs andab “Kalevalale” voimusen löuta uden, noren forman, raikta toižin da mel’düda ut sugupol’ved tetaban eposan lugemižehe. Se om ani čoma da melentartuine maht popul’arizoitta Karjalan rahvahiden kul’turad, sanui “Oma Media” -portalale baltianmeren suomalaižen filologijan kafedran opendai Tatjana Morozova.
Miše ühtneda konkursaha, tariž uhokun 28. päivähasai panda ičeze videorolik Internetha, a sid’ oigeta lähte videoho ühtes pakičusenke elektronižele počtale. Kirjeižen temaks pidab kirjutada “Lugem “Kalevalan” runoid” -konkurs”. Siš, miččed personaližed tedod tariž oigeta kirjeižes, voib tedištada kafedran oficialižel VKontakte-lehtpolel vai azjbumabaspäi konkursan oloidenke.
16. keväz’kud žürijouk tegeb “Lugem “Kalevalan” runoid” -konkursan ühthevedod. Kaik videorolikad pandas Petroskoin universitetan oficialižel lehtpolel.
Uzištoid neciš temas voib lugeda mugažo karjalaks, suomeks da venäks.
Tarkištele "Oma Median" Telegram-kanalad!
