Louhen piiri: kalastustu kilbah
Tänä suovattan 14. kevätkuudu pietäh Louhen piirin kalastuskilvat. Net pietäh Särgijärvel Malinavuaran kylän lähäl. Järven koordinuatat ollah 66.042768, 32.933657.
Kilbuniekkoi pannah kirjoile 9.00 čuasun aigah, kymmenen aigah sellitetäh turvalližussiännöt. Kilvat algavutah 10.15 čuasun aigah.
— Kilboi pietäh kolmes nominatsies: kalastajan yhtehine kalasualis (kaloin yhtehine paino), kaikis suurin kala da kaikis suurin kalasualis (ongitettuloin kaloin lugumiäry). Kilvan tulokset ilmoitetah 13.00 čuasun aigah, voittajii da kilbuniekkoi palkitah 14.00 čuasun aigah, ilmoittau Louhen piirin haldivo omassah VK-sivul.
Erikseh ruvetah kilbailemah miehet da naizet, ken teriämbäh purastau jiän. Käzipuras sih niškoi voibi olla hos kui suuri.
Sežo ruvetah palkiččemah kalastusjoukkoloi. Joukko ei voi olla viitty hengie suurembi.
Kilbah yhtyjes pidäy olla keral pasportu, onget, nažiuhku da hyvä mieli. Gostitandakse keitetäh kalaliemi.
Ven’an vezikoudeksan 65. stat’t’an mugah ajonevvoloin azetandu lähembä 50 metrii vezistöspäi on kielletty.
Yhty Oman Median kanualah Telegramas!
