Livvin murdehen paginoi tunnustau sistiemu
On valmistettu erinomaine tunnustussistiemu, kudai rubieu tunnustamah karjalan kielen livvin murdehen paginoi. Tämän ruavon pidi Ven’an tiedoakadeemien Sankt-Peterburgan federualline tutkimuskeskus.
Vuvves 2022 Sankt-Peterburgan federuallizes tutkimuskeskukses pietäh tutkimuksii paginan tunnustamizen avtomuattizien sistiemoin luadimizekse vähäresursahizih kielih nähte karjalan kielen ezimerkil.
Tunnustussistiemu kuuluu keskuksen enne luajittuh online-kiändäjäh, kudai käyttäy tegointellektua.
Kielentutkijoin tiedoloin mugah karjalan kieli on surman pardahal, uvvet tehnolougiet voidas pitkendiä kielen olemas olemistu. Tuliel aigua valmistetus tunnustussistiemas voibi rodiekseh tärgei laiteh Ven’an kandurahvahien kul’tuuroin kielitutkimuksis.
Täs ruavos piiteriläzien tiedomiehien kel yhtes oldih Karjalan tiedokeskuksen Kielen, literatuuran da histourien instituutan ruadajat.
— Sistiemu ruadau muga: tiedokonehen sistiemah tulou karjalankieline pagin, lopus se roihes tekstakse. Sendäh, ku täkse päiviä karjalan livvin murdeh on eminäl nägyvis nygyaigazis karjalankielizis julgavolois da joukkoviestimis, tutkijat vallittih livvin. Sistieman prustehennu on neiroverkon modeli, kuduadu opastettih livvinkielizien paginoin da tekstoin vuoh. Kaikis suuris vaigevus ruavos oli ainehiston vähys, kudaman vuoh voibi opastua neiroverkoloi. Paiči sidä nygöi karjalankielizes paginas on äijy ven’an sanua, mi vaigevuttau tunnustamistu: sistiemal pidäy tunnustua karjalankieline da ven’ankielizen pagin, sanoi ruadojoukkoh kuului Aleksandra Rodionova, Kielen, literatuuran da histourien instituutan ruadai.
Paginan tunnustamizen sistieman opastamizekse on tulkittu enämbi seiččiedy čuassuu audiotekstua da valmistettu ainehistuo, kuduas on enämbi viitty miljounua sanan käytön ezimerkii. Paginkorpussah on otettu GTRK ”Karelian” Oma randu -ohjelman ainehistuo, sego paginainehistuo, kuduadu nareko kerättih sistieman opastamizekse. Tekstoi on kerätty Periodika-julguamon da ”Verson” julgavolois, Oma Mua -lehten livvinkielizis kirjutuksis, VepKar-korpusas.
Sankt-Peterburgan federuallizen tutkimuskeskuksen tiedomiehien kerätyt ainehistot roitah ruokos erillizel serveral, se ei vaigu paranda tegointellektan ruaduo, ga vie andau mahton panna karjalankieline pagin tallele. Tiedomiehien luajittu sistiemu ielleh andau mahton avtomuattizesti stenografiiruija karjalankieline pagin, sen kebjendäy kielentutkijoin ruaduo.
Projektua todevutettih Ven’an tiedofondan kannatuksel.
Aihies voit lugie vepsäkse da suomekse.
