“Lastu” rubieu opastamah fotokuvuajan da kudojan neroloih
Priäžän kylän eläi Leonid Jakovlev oppiu kiännyttiä lapsii gadžetois käzineroh. Leonid Jakovlev on opastai, nerokas muasteri, lapsekas tuatto. Vuvvennu 2017 häi ellendi, midä ei tävvy nygyaigazile lapsile. Häi perusti heih niškoi puusepän pajan da pani sille karjalazen nimen “Lastu”. Vuvvennu 2021 virrallizesti perustettih ei-kaupalline laitos “Lastu”.
“Lastu” kuččuu 12 vuottu vahnembii lapsii da aiguzii opastumah puusepän neroh.
Puusepäs opastetah eri neroloih: kaiverdamah puudu, kudomah pajuvičois, kirjoindamah karjalazien luaduh, ombelemah tilkuzis, da toizih neroloih, kudamat pätäh eläjes.
Lapset kävväh suamah neruo “Lastuh” ilmai, aiguhizet voijat panna pajan kehittämizeh oman vuitin.
— Tänä vuon “Lastul” rodieu kaksi uuttu ruadoalua: “fotokuva” da “kudomine”, kaikin, ket tahtotah opastu nämmih neroloih, ollah tervehtulluot, sanou Leonid Jakovlev.
Muasteri toivou, ku puusepän pajas ruadajes lapset suajah olla hos vähäzen aigua internetattah, ku lapset opastutah ruadamah midätahto omin käzin, ku ruvetah pidämäh hinnois ei vaiku omua da toiziengi ruaduo.
