Lapsidenkacui Karjalaspäi tegihe ühthižvenälaižen konkursan laureataks

Svetlana Kobeleva tegi lapsile melentartuižen “matkan” Karjalan sügüz’mecha. Kuva om Karjalan opendusen da sportan ministran Roman Golubevan personaližel VKontakte-lehtpolelpäi

Petroskoin “Lumikello”-päivkodin lapsidenkacui Svetlana Kobeleva ühtni Ühthižvenälaižehe “Parahim kodikelen da literaturan opendai”-konkursaha i tegihe sen laureataks.

Konkursan lopuližed azjtegod mäniba 18.—23. sügüz’kud Čerkesskas opendajiden täht da Vladikavkazas lapsidenkacujiden täht. Svetlana Kobeleva Petroskoišpäi voibištelihe konkursan nominacijas “Kodikelen kehitoitusen parahimad praktikad školanedeližen igän lapsiden täht”.

20. sügüz’kud Svetlana hüvin päzui läbi ezmäižes kodvindas da putui 15 laureatoiden lugetišhe. Hän tegi lapsiden täht melentartuižen “matkan” Karjalan mecha, openzi heid mujutamha sügüz’lehtesid nimitaden erazvuiččid mujuid suomeks da openzi vändmaha kantelel.

Sid’, 20.—22. sügüz’kud, mäni rahvahan online-änestamine parahimas azjtegos školanedeližen igän lapsiden täht.

Kokursan ühthevedod tehtihe 23. sügüz’kud. Vägestajaks neciš nominacijas tegihe Gul’sina Išbajeva Baškortostanaspäi.