Lapsiden kollektiv Vidlaspäi kucui kaičemha meiden sinivauvašt Mad
Täl vodel Vidlan Vepsän fol’kloran keskuz tegi regionankeskeižen festivalin udes formatas.
Vidlan külän fol’klorkollektivad ozutiba ičeze ezitusid Vepsän fol’kloran keskuses, a lapsed Piterin agjan Pöudon rajonaspäi, Vologdan agjaspäi da Karjalaspäi oigenziba fotoid da videorolikoid konkursale počtal.
Konkursal lapsile pidi vaumita kaks’ tegendad: kollektivižen käzitön, mitte starinoičiži vepsän mas, vepsän rahvahas da sen tradicijoiš i sädaitegendan – pajon vai teatraližen ozutelusen kodiröunas. Vägestajaks tegihe «Kelen da tradicijoiden kaičijad»-kollektiv Vidlaspäi.
- Mö ozutim literaturišt-muzikaližen kompozicijan. Se oli kodiröunan da ühten aigan ekologijan temale. Mö omištim sen Piterin agjan Puhthan veden vodele. Mugažo vaumičim “Mec sügüzel”-käzitön, mitte oli tehtud kahtes tehnikas: ”applikacii kangahaspäi ”da ”kerttud bobaine”, sanui kollektivan ohjandai Gul’čehra Polivanova.
Toižen sijan sai ”Čomad kivuded”-fol’klorkollektiv Kalagespäi, koumanden – ”Kastkuine” Vologdan agjaspäi. Kaiked konkursaha ühtni 141 last.
