Lapsekas muamo sai urhon arvonimen
Vieljärves eläi L’udmila Filippova Ven’an prezidentan Vladimir Putinan käskyn mugah sai arvonimen ”Mat’-geroin’a”.
Prezidentan käskyn mugah korgei arvonimi on annettu kolmele naizele: Pskovan alovehel eläjäle Tatjana Vasiljevale, Rostovan alovehel eläjäle Os’ak Nadeždale da meigäläzele L’udmila Filippovale. Arvonimi ”Mat’-geroin’a” annetah naizile, kuduat suadih da kazvatettih enämbän kymmendy lastu.
Filippovien L’udmila da Iivan kazvatettih kaksitostu lastu. Ivan Filippov ruadau Vieljärven tulipalomiesozastos, L’udmila on kodihommis. Heijän vahnin tytär Duarju jo on täyttänyh 27 vuottu, hänel on oma pereh da kolme lastu. Kaikis nuorin Filippovien lapsi — tytär Nastoi vaste on täyttänyh nelli vuottu.
— Olemmo hyväs mieles, ku meidy arvostettih korgiel tazol. Kaikis enin hyviä mieldy on lapsil. Voin sanuo, ku valdivo auttau lapsekkahile perehile. Nelli vuottu tagaperin meile sotkontrakan vuoh nostettih uuzi kodi Vieljärveh, sygyzyl rodieu kolme vuottu, ku elämmö täs, sanoi Oma Mediale L’udmila Filippova.
Filippovien pereh alalleh kazvau, suurenou bunukoin arteli. Nygöi tuatan da muaman kel alalleh eletäh yheksa lastu. Kolme lastu eletäh linnas. Poigu tuli armisepäi da ruadau voimistelun opastajannu Petroskoin školas, tytär vaste ei ammui loppi meedikkuopiston.
— Hos arvonimi on ”Mat’-geroin’a”, ga lunnastimmo myö sen kahtei — minä da ukko. Yhteshäi saimmo da nostammo lapsii, sanoi L’udmila Filippova.
Aihies voit lugie suomeksegi.
