Lapšet Belgorodin alovehelta vieraillah Karjalašša
Heinäkuun 15.–30. päivinä Karjalašša vierailou 27 koululaista Belgorodin alovehelta. Nuoret vierahat ošallissutah rikkahah kulttuuriseh ta tiijolliseh ohjelmah. Hyö käyväh Kiži-šuarella, Ruskealašša, laškeuvutah kumilautoilla Šuojokie myöten, käyväh muasteri-oppiloissa.
— Kuččuma koululaisie Belgorodin alovehelta meilä Karjalah. Heijän kotimualla on vaikie tilanneh, šentäh staraiččima luatie näin, jotta lapšilla ois mukavua ta vesselyä. Valmistima šuuren rikkahan ohjelman, kirjutti Karjalan tašavallan piämieš Artur Parfenčikov omalla VK-šivulla.
Lapšie otettih vaštah Sirius 10 -keškukšešša, Kvantorium Sampo -teknotilašša, Petroskoin valtijonyliopissošša, Kanšallismusejošša, Karjalan kanšojen yštävyštalošša, Kantele-talošša, Karjalan filarmonijašša. Joka laitoš valmisti mukavan ohjelman
— Mie tykkyän kaikkie. Myö aina kävelemmä, käymmä missänih. Olen iloni, jotta olen ihmisien šeurašša, keškuštelen. Myö tutuššumma uuših ihmisih. Kävimä DJ-työn muasteri-opissa. Šen vetäjä oli tosi innokaš ta viritti meitä omalla karismalla, kerto omista vaikutelmista koululaini Uljana.
Tänä kešänä monet Venäjan alovehet otetah vaštah lapšie Belgorodin alovehen rajapiirilöistä, missä šäilyy vaikie tilanneh. Lapšilla järješšetäh lepuo leirilöissä ta kuntolaitokšissa.
