Läksi elospäi Ol’ga Žukova
Petroskoin universitetan Baltianmeren suomalaižen filologian kafedran docent, vepsän kelen opendai Ol’ga Žukova koli tožnargen 31.vilukud Petroskoiš. Hänele oli 44 vot.
Ol’ga Žukova sündui 19. tal’vkud vodel 1978 vepsläižes perehes Piterin agjan Kurb-küläs. Vodel 2001 hän lopi Petroskoin universitetan Baltianmeren suomalaižen filologian kafedran da radaškanzi necil kafedral vepsän kelen opendajan. Vodel 2009 Ol’ga polesti kandidatan dissertacijan temale ”Vepsläižiden veroiden voikuiden kelen erigoičused”.
Ol’ga Žukova oli Vepsän kul’tursebran ohjandusen ühtnikan, Karjalan kelen, literaturan da istorijan institutan radnikan, Karjalan termiž-orfografižen komissijan da Karjalan karjalaižiden, vepsläižiden da suomalaižiden ezitajiden nevondišton ühtnikan Karjalan pämehen ohjandusel.
Völ opetes školas Ol’ga zavodi kirjutada sarnoid da runoid vepsän kelel. Möhemba hän keradaškanzi vepsläšt lapsiden fol’klorad. Nece material mülüi ”Itti-totti”-kirjaha, miččes om čappajoižid, lugetišid, näritusid, erazvuiččid pajoižid da iloiteluzrunoižid. Vähäižen aigemba, vodel 2011, Ol’ga Žukoval läksi eloho ”Mäthudel”-kirj lapsile. Mugažo Ol’ga kerazi vepsläižiden muštatišiden ”Mi om meles, se i keles”-kogomusen. Hänen kirjutesid da runoid paindas ”Kodima”-lehteses, ”Kipinä”-kulehteses (miččes erasid vozid hän iče radoi), ”Verez tullei”-al’manahas. Ol’ga Žukova om mugažo oppindkirjoiden avtor, päazjan hän jatksi oppida vepsläižiden voikuiden kelen erigoičusid.
Vodel 2022 hän oli Vepsän kelen openduzsessian tomotajan. Openduzsessii mäni Petroskoiš da ühtenzoiti vepsläižiden kul’tursebroiden, muzejiden sa školiden radnikoid Karjalaspäi, Vologdan da Piterin agjoišpäi. Necikš aigtegoks Ol’ga Žukova vaumišti abukiraižen vepsän kelen opendamižen täht venän kelel.
Uzištoid neciš temas voib lugeda mugažo suomeks.
