Läksi eloho “Kodima”-lehtesen verez nomer
Om pästtud eloho “Kodima”-lehtesen redukun nomer. Siš starinoitas Venäman igähižiden rahvahiden uziš vastusiš: vepsläižiden ezitajad kožuihe ühthižrados adivoidenke Jugraspäi, a mugažo vepsläižed da seto-rahvahan ezitajad jagoihe toine toiženke ičeze mahtištol tedokonferencijal “Izborsk”-muzejal-kaičuztahol.
Sen ližaks vereses nomeras om tehtud “Minun külä” -literaturižen konkursan ühthevedod. “Kodiman” toimišton radnikoile oli ani melentartušt lugeda radod vepsläižiden da karjalaižiden küliden istorijas, eläjiš, muštsijoiš da tetabiš ristituiš. Äjad konkursan ühtnikad kirjutiba ičeze radoid čomal kodikelel. Ozutesikš, Lidia Ribakova kirjuti Pondalan paginal, i redukun “Kodiman” nomeras om paindud hänen čoma kirjutez.
— Teta da pagišta Karjalan rahvahiden kelil om ani tärged meiden suren man kul’turan kaičendan täht. Vereses nomeras voib löuta materialad siš, kut oma azjad keliden opendamižen poles: mitte situacii nügüd’ om Petroskoin universitetan Baltianmeren suomalaižiden keliden kafedral, kut planuitas tugeta openikoid i muga edemba, starinoiči “Oma Media” -portalale “Kodima”-lehtesen toimitai Irina Sotnikova.
Udes nomeras om kirjutused melentartuižiš ristituiš-ki: siš mušttas Rürik Petrovič Loninad, Polina Polikarpovna L’ovkinad da Nikolai Zaharovič R’abkovad. Mugažo redukun “Kodimas” lugijad voiba tundištadas lähemba ani melentartuiženke naiženke, vepsän kelen tundijanke Valentina Viktorovna Rogozinanke — lehteses om paindud sur’ pagištuz hänenke.
“Kodima”-lehtest voib otta “Periodika”-painištos ilma maksuta.
