KV-show täytti kakši vuotta

Älypelin aikana tarkissettih, kuin hyvin kaččojat muissetah faktoja projektista. 6+. Kuva: Uljana Tikkanen

Karjalaisien, šuomelaisien ta vepšäläisien kieliresurssikeškukšešša vietettih KV-show -projektin šyntymäpäivyä. Videolähetykšien johtajat Sandra (Aleksandra Aniskina) ta Ondrei (Andrei Gorškov) kučuttih vierahie ta piettih heijän kera älypeli, onniteltih apulaisie ta šuatih onnitteluja lämpimäššä ilmapiirissä.

— Kahešša vuuvvešša myö kuvasima 26 lähetyštä ta niih ošallistu 64 ihmistä. Myö matkuštima autolla yli 5000 kilometrie Karjalan eri paikašša, šano Aleksandra Aniskina.

— Alukši mie tahoin valmistua huumorilähetykšie, ka ajan mukah še vähitellen muuttu tiijollisekši ohjelmakši. Olemma erityisešti ylpiet šiitä, jotta meilä on täyvellini lähetyš vepšän kielellä ta nyt valmissamma lahetyštä karjalakši, lisäsi Andrei Gorškov.

Lyhyöt lähetykšet miellytetäh kaččojie. Projekti näyttäy, kuin voipi kehittyä ideja šuosittuh videoprojektih, kumpasen luatimisešta vaštuau kolme henkie, kakši vetäjyä ta kuvuaja.

Kaikki lähetykšet voipi kaččuo Oma Media -portalissa ta lähetykšen VK-ryhmäššä.