Kuuzen da pedäjän 40 tonnua käbyy – uvvekse mečäkse
Vilgan valličus- da siementuotandokeskukses 40 tonnas kerättyy da kuivattuu kuuzen da pedäjän käbyy on suadu siemendy meččien kunnostamizekse.
Kaikkiedah vuvven 2025 sygyzys algajen rahvahis on suadu 45,5 tonnua kuuzen da pedäjän käbyy. Enimät jo ollah kuivattu da niilöis on suadu 390 tonnua siemendy, kudamis ruvetah kazvattamah uuttu meččiä Karjalas.
Vilgan valličus- da siementuotandokeskukses suaduloi siemenii ruvetah kylvämäh tazavallan alovehel kanzallizen Ekolougien hyvys -projektangi mugah.
— Kuuzen da pedäjän kävyt pidäy kerätä erikseh, net pidäy panna moizih huavoloih, kudamih enne kerättih kartohkoi. Myö maksammo pedäjän kävylöis 60 rubl’ua kilo, da kuuzen kävylöis 80 rubl’ua, sanottih Oma Mediale Vilgan valličus- da siementuotandokeskukses.
Karelleshoz-laitos mustoittau, ku käbylöi vie otetah vastah. Rahvas voijah tuvva kerätyt kävyt da suaha niilöis makson Vilgan valličus- da siementuotandokeskukses, Suojärven da Lahdenpohjan meččypuustos, Yllözes da Kostamukses.
Yhty Oman Median kanualah Telegramas!
