Kuulužu paikannimistön tutkii täyttäy vuozii
Karjalan tazavallan kuulužu paikannimistön tutkii Irma Mullonen pidäy omassah vuozipäiviä 29. pakkaskuudu.
Tiedonaizen ruadotaival algavui vuvvennu 1981, konzu Irma Ivanovna tuli ruadoh Kielen, literatuuran da histourien instituuttah. Myöhembä häi oli sen instituutan piälikönny vuozinnu 2005—2015. Irma Mullozel on äijy opastujua, äijät kuulužat kielentutkijat kirjutettih kandiduatoin tutkimusruadoloi Irma Ivanovnan piän al.
Vuvves 1993 Irma Mullonen ruadau Petroskoin valdivonyliopiston baltiekkumeren-suomelazen filolougien da kul’tuuran tiedokunnan suomen kielen da literatuuran laitoksel.
— Kiitän Irma Ivanovnua avus da nevvolois. Ei vaigu minule, ga kaikile meijän kollegoile häi on tovellizen tutkijan da mielevän johtajan ezimerkinny. Irma Ivanovnal on midä ylbeillä, hänen piän al ”kazvettih” äijät meijän tiedomiehet. Toivotan Irma Ivanovnale, ku uvvet tutkimukset lämmitettäs syväindy, a moniluguzien opastujien uvvet suavutukset ihastutettas, sanoi Oma Mediale Irina Novak, Kielen, literatuuran da histourien instituutan piälikkö.
Filosoufien douhtoru, professoru Irma Mullonen on Ven’an da Karjalan tiedoalan arvostettu ruadai da Ven’an tiedoakadeemien vastuavu jäzen. Kielen, literatuuran da histourien instituutan kielitiijonlaitoksen piälimäzen tiedoruadajal on piäl 30 tiedojulgavuo.
Aihies voit lugie vepsäkse da suomeksegi.
Yhty Oman Median kanualah Telegramas!
