Kut putta Venäman igähižiden vähäluguižiden rahvahiden lugetišhe
Venäman Rahvahiden kosketusiden federaline agentstv tegeb Venäman igähižiden vähäluguižiden rahvahiden ezitajiden lugetišt. Miše putta neche lugetišhe, tariž oigeta pakičuz ”Gosuslugi”-portalan abul (sigä pidab täutta eriline elektronine pakičuzform) vai oigeta se počtadme agentstvan adresale.
Mugoine lugetiž abutab kebnemba sada vällendused. Sen taguiči ristituile ei tariž kaikuččen kerdan kerata kaikid azjbumagoid, miše vahvištoitta ičeze rahvahuden da oiktuded vällendusihe.
— Venäman igähižiden vähäluguižiden rahvahiden lugetišen abul voib vaiše kerdan vahvištoitta ičeze rahvahuden, i ei enamba tariž kerata azjbumagoid, miše kävutoitta oiktust tradicionaližen kalatusehe, mectusehe da erazvuiččihe valdkundaližihe tugihe, sanub Rahvahaližen da regionaližen politikan ministerstvan igähižiden rahvahiden valdkundaližen tugen erišton pämez’ Jelena Migunova.
Oigeta pakičusen voiba 14-voččed da vanhembad Venäman rahvanikad, kudambad oma Venäman igähižiden vähäluguižiden rahvahiden ezitajad, da vähäluguižiden rahvahiden sebrad (mugoižile sebroile tariž olda oficialižesti registriruidud).
Miše putta lugetišhe, ristituile pidab antta: pakičuz, azjbumag, mitte vahvištoitab rahvahuden (ozutesikš, sündundtodištuz), a sebroile — kaik juridižed rekvizitad da sen ühtnikan pasporttedod i kirjaline laskend.
Pätand pakičuses tehtas 30 päivän aigan.
Uzišt neciš temas voib lugeda mugažo venäks.
