Kut Petroskoiš praznuitas “Kalevalan” päiväd: azjtegoiden programm
28. uhokud praznuitas rahvahidenkeskešt “Kalevalan” päiväd. Necikš aigtegoks vaumištadas kogonaižes Karjalas. Petroskoin eläjile da adivoile om mugažo tehtud erazvuiččid praznikaližid azjtegoid, siš tedotab Karjalan kul’turministerstvan press-služb.
Uhokun 26. päiväd 14:00 časud Karjalan Rahvahaližes kirjištos mäneb “Lugem “Kalevalan” runod: “Kalevala” — Pajo Sampos” -literaturiž-muzikaline ezituz. Nece azjtego avaidab jogavottušt “Kalevalan” mozaik” -festivalid. Ezitusen aigan kaikil linneb voimuz kundelta tetaban eposan runoid mirun erazvuiččil kelil da muzikaližes formatas.
— Mugažo ozutam erazvuiččiden maiden taidehpirdajiden kuvid, miččed oli tehtud äjiden voziden aigan “Kalevalan” motivoile. Kuvad otam arvokahaspäi da surespäi kirjišton arhivaspäi, tedotadas Karjalan Rahvahaližen kirjišon Internet-lehtpolel.
Kanman “Kalevalan” päiväd, 27. uhokud, 15:00 časud Karjalan tätüteatran scenal ozutadas “KALEVALA.RUnod” -spektakl’, mitte om tehtud eposan motivoile. Spektaklin ohjandai om Belorussian taidehen arvostadud radnik Oleg Ž’ugždan. Kut tedotadas tätüteatran lehtpolel, necen ezitusen pätegend ei ole vaiše starinoita “Kalevalan” s’užetad: ohjandai tahtoi tehta tetaban eposan “karnavalizacijan”, kus om rahvahan iloižid da nagrandad. Pätem om sai: kut tetabad ženihod (Väinämöinen, Il’marinen, Lemminkäinen) eciba ičeleze čomid nevestoid. Nece spektakl’ om armastusen polhe, i siš om ani vähän sanoid — neniden sijas oma muzik da hibjan kel’.
27. uhokud 18:00 časud Karjalan Rahvahaližen teatran surel scenal ozutadas “Hyperbolaini”-spektakl’. Ohjandai Jegor Černišov da dramaturg Anastasia Bukrejeva oppiba “Kalevalan” runoid, karjalaižid mifoid da legendoid. Hö kacuiba vanhaze s’užetaha nügüdliäžil sil’mil i ozutiba spektakliš ristituiden kosketusid. “Hyperbolaini”-ezitusen pähengeks om tehtud Lemminkäinen.
28. uhokud Karjalan Valdkundan Rahvahaližes muzejas mäneb “Kalevalan” päiväle omištaud tradicionaline praznik. Adivoid varastab melentartuine programm: tematižid lekcijoid, erazvuiččid ekskursijoid da mastar’-klassoid.
Mugažo nügüd’ Rahvahaližes teatran ezizalas om avaitud “Karjala om “Kalevalan” ma” -ozuteluz. Sil om pandud ezile Karjalan mastariden radod — pun čapandaspäi omblusehe šlikuišpäi, poimetišehe da kudomižehe. Ozutelusel ristitud voiba nägištada, kut “Kalevala”-epos jatkub eläda nügüdläižes taidehes da jäb Karjalan kul’turan suren palan. “Karjala om “Kalevalan” ma” -ozuteluz ihastoitab ičeze adivoid keväz’kun 15. päivähasai.
Tarkištele "Oma Median" Telegram-kanalad!
