”Kummalline Rastavu”: kilvan tulokset ilmoitettu
Karjalan tazavallan Kanzallizes kirjastos mennyt pyhänpiän ilmoitettih perindöllizen Kummalline Rastavu -kilvan tulokset.
Kilbah otettih yksinäh da perehinneh luajittuloi, sego joukolleh školis, päivykodilois da kirjastolois valmistettuloi taidoruadoloi. Kilbah omat ruavot työndi enämbi 500 kilbuniekkua viijes kaheksahtostu vuodessah Petroskois, Onieganrannikon da Anuksen piirilöis, Pitkäsrannas, Priäžäs, Kostamukses, Kondupohjas, Puudogas, Čuvašien tazavallas, Donetskan rahvahan tazavallas, Arhangelin, Kalugan, Piiterin alovehil da muijalpäi.
”Kummallistu Rastavua” piettih online-kilvannu kolmes nominatsies: ”Rastavan motiivat”,”Minun Rastavan tarinu”, ”Käilkirjutettu kirju Rastavah nähte”.
Käilkirjutettu kirju Rastavah nähte -nominatsies voittajikse piästih Puudogas eläjät Diana da Nikita Kleščenok. Nellitostuvuodehistu Dianua da kolmevuodehistu Nikitua autettih muamo Margarina da Kotkatjärvel eläibuabo Valentina Bukina.
— Meijän pereh da meijän lapset puaksuh yhtytäh kaikenmoizih kilboih. Täl kerdua piätimmö yhtes luadie kirju, kuduas olis tarin Rastavah nähte da ližäkse mieldykiinittäjiä harjaitustu, ku lapset lugijes voidas lekuttua aivoloi. Minä ruan psihoulogannu lapsienpäivykois da ellendän, ku se on hyvä da tärgei lapsen kazvattajes. Lapsien buabo autoi meidy kielen puoles, ku kirju meil on kaksikieline — ven’akse da karjalakse. Minä ičegi maltan karjalan kieldy, ga muamo aitoi meidy, kui pidäy oigieh kirjuttua karjalakse, sanoi Margarina Kleščenok Oma Media -portualale.
Kilbuniekkoi juattih eri igäjoukkoloih: net, ket vie ei kävvä školah, alaigäzet školaniekat 7—12 vuottu da 13—18 vuottu opastujat.
Kilvan järjestäjät da arvostajien joukko mielihyväl otettih vastah taidoruadoloi, kuduat kuvatah pravosluavizen da katoulizen Rastavan histouriedu da perindölöi, sego ollah kirjutettu Karjalan tazavallan kandurahvahien kielil.
