”Kuldaine sulgaine” keriäy mul’tfilmoin luadijoi
Priäžän etnokul’tuurizen keskuksen piän al 28.—30. ligakuudu pietäh mul’tfilmoin Kuldaine sulgaine -festivuali. Se roihes jo nelläs tämänmoine pido. Ga enzimästy kerdua sidä pietäh offline-muvvos. Jessoilan Valgien kodine -stuudien rattahile panduu festivualii enne sidä ainos piettih online-muvvos.
— Priäžän etnokeskuksen väil opimmo kannattua Priäžän piirin kyläläzien alguhpanoloi. Jessoilan kyläs se on mul’tfilmoin luajindu. Konzu kirjutimmo projektan ”Karel’skije pomoči” mil’tfilmoin festivualingi otimmo joukkoh, sanoi Oma Mediale Tatjana Seppänen, Priäžän etnokeskuksen piälikkö.
Festivualih on annettu 111 zajavkua, sih yhtyy 44 mil’tfilmoin luadijoin stuudiedu ymbäri Ven’ua. On kilbuniekkua Jekaterenburgas, Joškar-Olas, Ulan-Udes, Lugas, Sočis, Moskovas, Tulas, Habarovskas, Jaroslavl’as, Saratovas, Južno-Sahalinskas da muijalpäi.
Kai mul’tfilmat oldih työtty festivualin pidäjile edukädeh, arvostusjoukko luadi festivualin šort-listan. Sih puuttunuon filmat festivualin aigah ozutetah Priäžän kylän detsadulazile lapsile da algukluasoin opastujile.
Festivualin kolmen päivän aigah pietäh ruado-pajoi mul’tfilmoin luajindas, pyöryžy stola lapsien animatsien probliemois da tulies aijas.
Karel’skije pomoči -projektua todevutetah Prezidentan kul’tuurualguhpanoloin fondan kannatuksel.
