Kul’tuuruperindön säilyttämine: vellalližus tulieloin sugupolvien ies
Ven’an prezidentan käskyn mugah luajitah programmua meijän muan kul’tuuruperindön objektoin säilyttämizekse vuozikse 2025-2045. Aktiivizembah ruadua programman todevuttamizekse on käskenyh Ven’an halličuksen piämies Mihail Mišustin vuvven 2024 lopus pietyn strateegizen sessien jälles. Pivon aigah Mihail Mišustin korosti, ku tänäpäi Ven’al on lähes 160 tuhattu kul’tuuruperindön objektua.
— Histourien, arhitektuuran mustomerkilöin, perindölöin, hengellizien kallehuksien akkiloičendu merkiččöy ei vaigu mennyzis aijois huoldu. Se on meijän vellalližus tulieloin sugupolvien ies, sanoi Mihail Mišustin Ven’an halličuksen virrallizen saitan mugah.
Ruavon lopputulokset pidäy jiävie halličuksele vuvven 2025 kevätkuun 31. päiväh suate. Sih aigah pidäy olla tarkua tieduo mittumien kriteerieloin mugah objektoi ruvetah valliččemah programmah pandavakse da jälles kohendettavakse, kuspäi otetah varua sih ruadoh da kui sidä ruvetah ruadamah. Programmua ruvetah varustamah kul’tuuran, finansoin, ekonoumizen kehityksen ministerstvat, ”DOM.RF” da alovehellizet valdivonelimet.
Sen jälles vuvven 2026 kezäkuun 1. päiväh suate pietäh pahas kunnos da valdivon kirjoil olijoin kul’tuuruperindön objektoin inventarizatsii. Tämä ruado on kul’tuuruministerstvan alovehien tuvel ruattavu ruado.
Paiči sidä kul’tuuran da ekonoumizen kehityksen ministerstvoil pidäy sulakuun 30. päiväh suate valmistua da työndiä halličukseh federuallizen zakonan projektu, kuduan mugah kul’tuuruministerstval rodieu oigevus miärätä hinnat kul’tuuruperindön objektoi kohendajes.
Ven’an halličuksen piämiehen käskyt koskietah ruadajiigi. Mišustin käski Ven’an kul’tuuruministerstvale vuodessah 2030 valmistua 3 tuhattu spetsialistua kul’tuuruperindön objektoin säilyttämizen alale.
