Kul’tuurukeskus nostetah karjalazien valattamizen 800-vuozipäiväkse
Suojärves Hristosan Roindan kirikön rinnale allettih rakendua hengellisty kul’tuurukeskustu. Rakendamine loppuu vuvvennu 2027, konzu meijän tazavaldu pidäy karjalazien valattamizen 800-vuozipäiviä.
Kul’tuurukeskuksen rakendus on jo nostettu da on lämmitettävänny. Nygöi rakendajat luajitah ulgo- da syväinruadoloi. Rakendamizen jälles hengelline kul’tuurukeskus rodieu tärgienny kohtannu linnan eläjile da gostile. Täs pietäh pyhänpäivän školan urokkoi, eri vastavuksii, konferensieloi da kerähmölöi.
— Joga ristikanzale on tärgei olla kosketuksis toine toizenke kirikön ulgopuolel, kuduah rahvas tullah panemah malittuu. Täs voibi pidiä urokkoi lapsienke da konferensieloi, paista tärgielöis hengellizis kyzymyksis. Sidä paiči meile tullah pyhilekävyjät da rahvas, kudamat tahtotah tuttavuo meijän linnah da aloveheh, sanoi kirikön pappi V’ačeslav Volodin Karjalan piämiehen lehtistöpalvelule.
Karjalan piämies Artur Parfenčikov kiitti kirikön pappii da hänen akkua ruadolois. Häi huomai, gu enzimäzekse kirikköh nähte ollah tärgiet rahvas, kuduat yhtistytäh malittuh da hyvii dieloloi ruadamah. Parfenčikovan sanoin mugah on tärgei, ku moizet keskukset oldas jogahizes eländykohtas, jogahizen kirikön tyves.
Suojärven keskuksen projektu jo on suannuh korgeviman arvostuksen federuallizel tazol da voitti Kanzalližuksien azieloin federuallizen agenstvan kilvas. Hristosan Roindan kirikön prihodu todevuttau tädä projektua federuallizen b’udžietan kannatuksel.
Aihies voit lugie suomeksegi.
Yhty Oman Median kanualah Telegramas!
