Kuččuu milma Kotimua
Periodika-kuštantamošša ilmešty Kuččuu milma Kotimua -runokokomuš. Pitälti vuotettu kirja keräsi kanšiloih vienankarjalaisen runoilijan Sergei Jakovlevin (1970—2023) luomisperintyö.
Sergei Toivovič alko kirjuttua runoja karjalan kielellä vuotena 2020. Kolmešša vuuvvešša niitä šynty noin šata. Omissa tevokšissa runoilija kuvuau kotimuan kaunehutta ta luontuo, kertou kylän elämäštä ta karjalaisešta rahvahašta.
— Kokomukšen šuuri arvo on šen kielirikkahuošša. Kirjutetut hyvällä karjalan kielellä runot varmašti autetah kaikkie, ket opaššutah kieltä koulušša, yliopistošša, kurššiloilla. A kielen snaiččijilla runokokomuš tulou hyväkši lahjakši — ymmärtäväkši ta lähisekši, on varma kokomukšen toimittaja Maikki Remšujeva.
Kuččuu milma Kotimua -kokomuš keräsi kanšiloih Sergei Jakovlevin 88 eriaihiesta runuo, mit on juattu kuuteh ošah: “Miun Karjala”, “Himottau kotih”, “Oma tähti”, “Mimmoni on onni?”, “Monenvärini luonto” ta “Iltašuarna”. Vereš runokokomuš on tärkie aškel karjalankielisen kirjallisuon kehittämiseššä.
Kautena, konša muamonkielet vuajitah erillistä kannatušta ta tukie, “Kuččuu milma Kotimua” kuuluu kuin runoilijan varma iäni. Iäni, mi kuččuu kotih — juuriloih, omah kieleh, iččieh.
Kirja on julkaistu Karjalan Rahvahan Liiton Karjala henkilöissä: Istorija. Kieli. Kulttuuri -projektin rajoissa Karjalan piämiehen granttifondin kannatukšella.
