Kruuga yhisti kanšoja šuureh piirih
Kantakanšojen päivänä 9. elokuuta Karjalan piäkaupunkissa ta piirilöissä piettih perintehellini etnokulttuuritapahtuma “Karjalaini kruuga”.
Karjalaini perintehellini tanšši “Kruuga” yhistäy ihmisie. Kun šitä vejetät voipi kaččuo toisien ihmisien šilmih ta tervehtie pruasniekkah tullutta rahvašta. Tänä vuotena Karjalaisen kruugah ihmisie kučuttih uuteh paikkah — Petroskoin rantakavulla.
— Karjalašša hyvissä šuhtehissa ta rauhašša eläy yli 110 kanšua. Tämä aktijo näyttäy, kun voipi yheššä ruatua ta luatie meijän muata vielä paremmakši ta kaunehemmakši, šano Karjalan kanšallisen ta alovehellisen politiikan ministeri Sergei Kiseljov.
Kanšojen yštävyön tanššin vetäjänä oli Karjala-ansamblin johtaja Andrei Anisimov.
— Karjalašša kruugoja vejetäh, katrillija ta lantsija aššutah ta piirileikkijä kisatah. Kruuga on ylen vanha tanšši, še on ritualitapahtuma. Joka kyläššä oli oma kruuga: Uhtuon, Rukajärven, Seesjärven ta toisie. A meijän kruuga on kanšojen yhistäjä tanšši. Ota yštävie käteh ta aššukkua miun tuakši, šano Andrei Anisimov.
Halukkahie ošallistumah kruugah tänä vuotena oli niin äijän, jotta kaikki ihmiset ei mahuttu yhteh piirih, ka še ei häirinnyn šuaha tanššista hyvyä mieltä. Pruasniekan vetäjät kiitettih kaikkie tullehie ta erikoisešti niitä, ket tultih kanšallisissa pukuloissa.
Kruugua tanššittih niise Karjalan monešša piirissä.
