Kostamus: toppii ruvetah keriämäh lajitellen
Karjalan tazavallan piämiehen käskyn mugah Kostamuksen linnas šeikuittih toppien lajiteltuu keriändiä. Ruadojoukko pidi istundon Karjalan tazavallan luonnonrikkahuksien da ekolougien varaministran Aleksei Pavlovan piän al.
— Ruadoistundos olijat pandih merkile, ku nygöi kostamukselazet vähembän paheksitah ”Karjalan ekolougien operuattoran” ruaduo. Kostamukses ielleh kerätäh toppii da lomuloi pakiettoih, se on linnalazile mieldy myöte, kerdou Karjalan tazavallan piämiehen lehtistöpalvelu.
Paiči sidä on kunnon luaduh organizuittu suurien lomuloin iäres viendy, net vietäh zajavkoin mugah kolmen päivän aloh. Piettylöi autorattahii otetah vastah Karel’skii okatiš -laitoksen tilois.
Alovehen eräs tärgevimis ruadolois on toppien erilline keriändy. Tämän problieman sellittämizekse huavatah azettua ekostansiet. Moizet stansiet jo seizotah suuris laukois — ”Lentas” da Lotos Plaza -laukas. Tädä projektua todevuttamah ruvetah Karel’skii okatiš -laitoksen kannatuksel. Deputuatat da alovehen haldivo aktiivizesti yhtytäh täh ruadoh. Kostamuksen alovehen rahvas ollah valmehet lajitella toppii da kerätä niilöi erikseh. Ekostansiet autetah parandua ekolougistu tilandehtu tazavallas.
