Kostamukses omas tahtos ruadajien keskus sai virrallizen stuatusan
Kostamuksen linnas 1. sulakuudu on avattu hyvyönluadijoin 10 region -liiton keskus. Omas tahtos ruadajat rahvas autetah erillizen voinuoperatsieh yhtynyzile vuvven 2022 sygyzys algajen. Nygöi kekukses on jo enämbi 200 hengie, kuduat kuvotah peittoverkoloi, sublimoijah syömizii, ommellah dronoi vastazii kattieloi, luajitah nosilkoi, polvien suojuksii da tostu tarvittavua.
Hyvyönluadijoin 10 region -liittoh kuulutah omas tahtos ruadajien pienembät järjestöt — ”Voiton verkot”, ”Voiton ombelijat”, ”Kenttykeittivö”, ”Syväinkerän lämmin” da ”Hobjaine omatahtoine ruado”, kudamih kuuluu enämbi 600 hengie Louhen piiris Lahdenpohjan rannoissah. Äijät heis ollah erillizeh voinuoperatsieh yhtynyzien omahizet. Nämmä rahvas kerätäh da vietäh gruuzuloi bojukohtih, kus ollah palvelimas karjalazet miehet.
Karjalan tazavallan piämiehen sijahine Aleksandr Pšenitsin, kudai vastuau yhtehizes ruavos zakonoinvalvonduelimien kel, yhtyi Kostamuksen omas tahtos ruadajien keskuksen avajazih.
— Tovelline omanmuansuvaičus nägyy ruadolois, ei sanois. Erillizen voinuoperatsien algavuttuu omas tahtos ruadajat kostamukselazet kerras ottavuttih auttamah sie olijoi. Muga ruttoh ottavuttih, ga toizet Karjalan piirit otetah heis ezimerkii. On mostu ruaduo, kudamua ei ruata nikus muijal Karjalas, sanommo, sublimoitut syömizet. Karjalan tazavallan piämiehen nimes tahtozin kiittiä kostamukselazii, sanuo passibot Kostamuksen linnan haldivole, Karel’skii okatiš -laitoksen piälikkölöile, rajanvardoiččijoile, kaikile, ket autetah yhtehizii projektoi, sanoi Aleksandr Pšenitsin Karjalan tazavallan piämiehen lehtistöpalvelun tiedottehen mugah.
Jelena Zez’ulčikan, Kostamuksen keskuksen piälikön sanoin mugah täkse aigua Karjalas on 26 omas tahtos ruadajien tilua, kudamis kuvotah peittoverkoloi. On valmistettu da työtty frontale enämbi 4 tuhattu peittoverkuo, kudamien yhtehine pinduala on enämbi 50 tuhattu nellikkömetrii, enämbi 550 katettu da 120 lämbökaamerua vastastu pončuo, enämbi 200 nosilkua, sego 55 tuhattu sublimoitun syömizen annostu.
Omas tahtos ruadajien ruadotilois kerätäh gumanitaaristu abuu, erillizeh voinuoperatsieh yhtynyzile tarvittavua vehkehty. Paiči sidä keskukset valmistetah lapsile tarkoitettuloi pidoloi omanmuansuvaičukses.
