Korti lahjakse Uvvekse Vuvvekse
Perindö piirustua Rastavan da Uvven Vuvven kortiloi tuli Ven’al ulgomualpäi. Enzimäine korti piirrettih Anglies vuvvennu 1843, sen jälles moudu ylen terväh leveni Jeurouppah, ilmoih piäzi tuhanzii kortiloi. Ven’al kortiloi ruvettih painamah XIX luvun lopul da silloi net oldih ylen kallenet. Erähät piirrettih kortiloi iče, net oldih ylen čomat, niidy riputettih seinil, pandih erilazih al’boumoih, mielihyväl ozutettih gostile. Nygyaigua tämä perindö rubei hil’l’akkazin häviemäh, myö puaksumbah työnnämmö kortiloi Internetan kauti libo kirjutammo viestilöi telefonan kauti. Karjalan Rahvahan Liiton kilvan tarkoituksennu on muistoittua hyväs perindös da kuhkuttua hyvittelemäh omahizii da dovariššoi čomal kortil.
Kilbah yhtyi 118 hengie, piirustettuloi kortiloi tuli Anuksen piirin Videlen, Tuuksen, Alavozen, Kotkatjärven, Mägriän kylispäi; Priäžän piirin Čalnan, Jessoilan, Vieljärven kylispäi, Louhen piirin Piäjärven kyläspäi, Mujehjärvespäi, Petroskoispäi da Pitkäsrannaspäi.
Lapset luajittih erilazii čomii, hyväluaduzii kortiloi, piirrettih kynäl dai akvarielil, luajittih aplikatsieloi.
— Kilvan siändölöin mugah kortih pidi panna hyvittely karjalan kielel. Kengo kirjutti yhten virkehen, kengo pani kogonazii runoloi. Valličuskunnal oli jygei vallita parahien joukko, ku kai kortit oldih ylen hyvät, sanou liittolaine, kortiloin arvostelii Valentina Mironova.
Ezmäzen sijan diploman sai 10-vuodehine Viktorija Suhova Pitkäsrannaspäi. Toizen sijän diploman suadih Petroskoin školan noumeru 26 nelländen kluasan opastui Luka Dolmatov da 7-vuodehine Uljana Djakonova Pitkäsrannaspäi. Kolmanden sijan sai 9-vuodehine Marija Stepanova Videlespäi.
