Kolatselläl uvvistettih mustokohtu
Priäžän piirin Kolatsellän kyläs uvvistettih da suurendettih voinih kuadunuzien mustokohtu. Ruadoloin tulokset virrallizesti avatah syvyskuun 30. päivänny.
Kolatselläl yhtes kalmas ollah Talvivoinah da Suureh Ižänmuallizeh voinah läs viijensuan hengen kuadunuzien jiännökset. Toizet ollah 18. ammundudiviizien saldatat da ofitsierat, kudamat kuoltih hyökätes Pitkährandah päi vuozil 1939—1940. Suurin vuitti kuadunuzis ollah Karjalan frontan seiččemenden armien miehet, kudamat vojuittih Kolatsellän lähil vuozil 1941 da 1944 — Käsnäsellän da Vieljärven kohtil.
— Paikallizen rahvahan ičeväil jäi vai kabrastua kalmužin da sen ymbäristö. Mustokohtu on ihan kylän keskukses, kluuballuo — sen periä kezän aijan muudu piduo kyläs ei olluh, mendih kohendusruavot, sanou kylän aktivistu Zinaida Lomujeva.
Kolatsellän pienen kylän eläjil nämmä ruavot ollah tärgiet — yhtehizes kalmas on oman tapoksen kuolluttu. Kohendusruavot kuulutah federuallizeh programmah, kudaman puittehis tänä vuon piettih suuret ruavot vie Ladva-kylän mustokohtal. Mulloi uuzi memoriualu rodih Onieganrannikon piirin D’arvenojan kyläs.
