”Karjala om mö” — karjalan, vepsän da suomen keliden tedajiden online-konkurs om omištadud Mamankelen päiväle. Ühteta sihe voiba Karjalan valdkundan eläjäd.
Konkursas oma küzundad karjalan, vepsän da suomen kelen, istorijan da etnografijan polhe. Konkursan tegijad oma Karjalaižiden, vepsläižiden da suomalaižiden mediakeskuz da Periodika-paindišton toimištod.
— Om mel’he, miše joga vodenke konkursaha ühtneb kaik enamba tahtnikoid. Ühtnikoiden keskes oma eri-igäižed ristitud. Hö ozutaba hüvid vepsän kelen da kul’turan tedoid. Joga voden mö kollegoidenke naprim tehta melentartuižid küzundoid, miččed koskeba vepsän rahvahan elon erazvuiččid polid. Erasid vastusid eskai ei voi löuta kirjoiš, niid pidab ecta rahvahas, sanub Kodima-lugendlehtesen pätoimitai Irina Sotnikova.
Kodvda ičeze tedoid vepsän kelen da kul’turan polhe voib tägä.
Vastused ottas 17. päivähasai uhokud. Konkursan satused tuleba eloho 23. uhokud.