“Kodimailla” paissah karjalakši ta karjalaisista
Viisi päivyä tverin- ta vienankarjalaiset, inkeriläiset, inkeröiset ta venäläiset opaššuttih luatimah käsitöitä, tanššimah, esittämäh spektaklie, pakajamah karjalakši. Tapahtumilla täyven ta monipuolisen ohjelman keškiteemana oli karjalan kieli.
Festivalissa opaššuttih karjalan kieltä alku- ta jatkotašon kurššilla. Niitä piettih Oleg Jevgrafov ta Uljana Tikkanen. Alkutašon kuršši piettih uuvven tverinkarjalan Šanoniekka-opaššuškirjan mukah.
— Še yhistäy teemoja, kumpaset kerrotah “Tverin Karielan kodin” toiminnašta ta projektiloista. Kirjašša on uutta šanaštuo, äijän leikkijä ta lauluja karjalan kielellä, šelitti Oleg Jevgrafov, Kodimailla-forumin järještäjä.
Monet vierahat tultih forumih opaštumah kutomah vöitä tahi ompelomah paitoja, paistamah kalittoja tahi vuolomah puuta. Muasteri-oppija järješšettih ta kučuttih opaštajie Tatjana Žil’tsova ta Iivo Petuškov.
Oli pietty opašretki Stan-kyläh, a šuovatta oli järješšetty teatteriohjelma. Kaikki halukkahat opaššuttih artistan mestaruon šaloja šekä tanššimah, šoittamah ta pitämäh pakinoja lavalta ta šiitä kaikki kučuttih improvisatijospektaklih Kalevala-eepossan teeman mukah. Taitotapahtuman ohjuajana oli Darja Šibalova.
— Mie nävin tiälä, kuin kova on yhissyš ihmisien välissä, kumpasilla on itämeren-šuomelaisien kanšojen juuret, kumpaset šäilytetäh omua kieltä. Karjalan kieltä kuuluu aina, mie panin muistih karjalaisie šanoja. Ihmisillä tiälä oli mahollisuš paissa karjalakši, miettie omašta kanšašta ta šiitä ken šie iče olet, šano liäkekašvien keryäjä Natalja Starovoitova.
Etnoforumin järještäjät ta ošallistujat toivotah, jotta perintehet šäilytäh ta ihmisillä šyntyy kiinnoššušta kieleh ta kulttuurih. Forumi pietäh Tverin alovehen halličukšen raha-avulla.
