“Kodima” tundištoitab melentartuižiden ristituidenke
Om lähtnu eloho “Kodima”-lehtesen verez nomer. Siš lugijad voiba löuta elokun užistoid da materialoid vepsän man melentartuižiš ristituiš.
Kezan jäl’gmaižes kus “Kodiman” toimišt päti starinoita lehtesen lugijoile lahjakahiden vepsän man ristituiden polhe, kudambiden čomad radod da projektad ihastoitaba kut Karjalan, muga toižiden-ki Venäman agjoiden eläjid. Heiden keskes om Art’om Stepanov — mahtokaz pusep’. Hänen uz’ art-objekt om čomad puižed kurged, miččed kacuba taivhaze. Mugažo udes nomeras om kirjutuz vepsläižiš, kudambad eläba Sibiriš.
— Vereses nomeras om mugažo sur’ pagištoituz Julia Lukoninanke — “Vepsskaja gornica” -adivpertin emäganke. Meile oli lujas melentartušt tundištadas Julianke da starinoita hänen čoman adivpertin polhe. Meletan, miše nece-ki om vepsän kul’turan kaičend, sanub “Kodima”-lehtesen pätoimitai Irina Sotnikova.
Elokun “Kodiman” nomeras oma mugažo uzištod “Vepsläine neižne” -spektakl’an sures sabustuses Krimas, vanhoiden pühäkodiden udessündutamižes, Jurii Mihailovič Mugačevas hänen 90-voččeks jubilejaks, Nina Zaicevan uden kirjan prezentacijas i m.e.
“Kodima”-lehtest voib otta “Periodika”-painištos ilma maksuta.
