“Kodima”-lehtez putui Venäman öbokan parahiman joukvestišton lugetišhe
”SMIrotvorec”-konkursan žürijouk tegi ühthevedod da nimiti Venäman öbokan 33 parahint joukvestištod. Neche lugetišhe putui “Kodima”-lehtez.
Täl vodel “Kodima”-lehteselpäi ”SMIrotvorec”-konkursale oli oigetud kaks’ kirjutest: Natalja Bukovskajan “«Enarne ma» möst kerazi sebranikoid” da Irina Sotnikovan “Hän kandab armastust kodikel’he voziš päliči”.
— Necil Opendajan vodel meiden lehteses mö starinoičim vepsän man opendajiš. Üks’ kirjutesišpäi om Ol’ga Mironovan polhe, hän radoi Kalagen školas 36 vot, niišpäi vepsän kelen opendajan 26 vot. Kut zavodihe vepsän kelen opendamine Kalagen školas, kuspäi Ol’ga Jevgenjevna oti materialoid urokoiden täht, oli-ik lapsil taht opeta kodikel’t, miččid jügedusid oli, starinoičeb konkursale oigetud kirjuteses “Kodima”-lehtesen pätoimitai Irina Sotnikova.
Konkursan ekspertoiden jouk kacui läz 900 kirjutest 142 Venäman öbokan federaližes ümbruzkundaspäi. 33 joukvestištod putui parahimiden lugetišhe. Nügüd’ valitas niišpäi vägestajad. Parahimad Venäman öbokan joukvestišton radnikad, kudambad kirjutaba rahvahidenkeskeižile da konfesioidenkeskeižile temoile, pauklahjoitas 31. kül’mkud Arhangel’skas.
